Kuiers by oupa

So vat die man met die hoed my terug na my kinderdae kuier by oupa in sy hartbeeshuisie op n plaas in Groot Marico.

Vroeg more se wakker word met die geknetter van die vuur in die koolstoof en die sis van die ketel op die stoof is so helder voor my. Mammie het dan al koffie gemaak, dit staan in trek in die emalje pot met n sakkie binne in, die geur – hemels. Sodra sy sien jy is wakker word n beker koffie met kondensmelk geskink. Daardie smaak neem my altyd terug na so n kosbare tyd in my lewe.

As jy vroeg genoeg wakker geword het, sal jy oupa hoor… Elke more le oupa en hou stiltetyd. Hy se n hoofstuk op uit sy kop, bid en sing dan n Psalm of Gesang, al die strofes. Hieroor sal ek op n ander dag blog, n spesiale storie op sy eie.

Wat n kosbare herinnering uit my trommeltjie, dit verwarm my hart om dit so in my gedagtes te herleef. Wat n voorreg was dit nie om in daardie armoedige huisie te kuier nie.